എസ്എന്‍ഡിപി യോഗം വൈക്കം യൂണിയന്റെ അഹസ്സിന് ഒരുക്കങ്ങളായി
13/11/2024
വൈക്കത്തഷ്ടമിയുടെ മൂന്നാം ഉത്സവം എസ്എന്‍ഡിപി യോഗം വൈക്കം യൂണിയന്‍ അഹസ്സായി ആഘോഷിക്കുന്നതിന്റെ ഭാഗമായി നാലമ്പലത്തിനകത്ത് യൂണിയന്‍ പ്രസിഡന്റ് പി.വി ബിനേഷ് അഹസ്സിന് അരി അളക്കുന്നു.
വൈക്കം: വൈക്കത്തഷ്ടമിയുടെ മൂന്നാം ഉത്സവ ദിനമായ വ്യാഴാഴ്ച എസ്എന്‍ഡിപി യോഗം വൈക്കം യൂണിയന്‍ അഹസ്സായി ആഘോഷിക്കും. ഇതിന്റെ ഭാഗമായി രാവിലെ ഏഴിന് യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ ആനക്കൊട്ടിലില്‍ തുലാഭാര വഴിപാട് നടത്തും. തുലാഭാരത്തിന് ശേഷം നാലമ്പലത്തില്‍ ദര്‍ശനവും നടത്തും.
വനിതാ സംഘം യൂണിയന്റെ പൂത്താലം വൈകിട്ട് അഞ്ചിന് ആശ്രമം സ്‌കൂളില്‍ നിന്ന് ആരംഭിക്കും. കച്ചേരിക്കവല, പടിഞ്ഞാറേ ഗോപുരം വഴി ഏഴിന് ക്ഷേത്രത്തില്‍ പ്രവേശിക്കും. വാദ്യമേളങ്ങളും ദേവീദേവന്മാരുടെ പകര്‍ന്നാട്ടങ്ങളും വര്‍ണക്കുടകളും പൂത്താലത്തിന് അകമ്പടിയാകും. അഹസ്സിന്റെ ഭാഗമായി യൂണിയന്റെ വഴിപാടായി പ്രാതലും ദീപാരാധനയോടനുബന്ധിച്ച് ലക്ഷദീപവും വെടിക്കെട്ടും പുഷ്പാലങ്കാരവും ഉണ്ടാകും.
അഹസ്സ് ആഘോഷിക്കുന്നതിന്റെ ഭാഗമായി നാലമ്പലത്തിനകത്ത് യൂണിയന്‍ പ്രസിഡന്റ് പി.വി ബിനേഷ് അഹസ്സിന് അരി അളന്നു. യൂണിയന്‍ സെക്രട്ടറി എം.പി സെന്‍, അസി. സെക്രട്ടറി പി.പി സന്തോഷ്, ബോര്‍ഡ് മെമ്പര്‍ രാജേഷ് മോഹന്‍, എസ് ജയന്‍, പി സജീവ്, ദേവസ്വം അഡ്മിനിസ്ട്രേറ്റീവ് ഓഫീസര്‍ വി ഈശ്വരന്‍ നമ്പൂതിരി എന്നിവര്‍ പങ്കെടുത്തു. ഉച്ചയ്ക്ക് ഊട്ടുപുര മാളികയില്‍ 20 പറ അരിയുടെ പ്രാതല്‍ ഒരുക്കിയിട്ടുണ്ട്. കലാമണ്ഡപത്തില്‍ കലാപരിപാടികളും അരങ്ങേറും.